СУКАЧ (Сукач - русс.) — вёска ў складзе Любашаўскага с/с, за 6 км на поўнач ад горада і чыгуначнай станцыі Ганцавічы (на лініі Лунінец — Баранавічы). 44 двары, 62 жыхары (14.10.2009 г.), на сакавік 2015 года 56 жыхароў.


У 2-й палове 19 ст. — вёска Круговіцкай воласці Слуцкага павета Мінскай губерні. У 1890 г. 4 двары. Паводле перапісу 1897 г. 12 двароў, 82 жыхары. У пачатку 20 ст. засценак той самай воласці і павета, у 1909 г. 15 двароў, 65 жыхароў.


З сакавіка 1921 г. ў складзе Польшчы, засценак Круговіцкай гміны Лунінецкага павета Палескага ваяводства, у 1921 г. 23 дамы, 136 жыхароў.

З 1939 г. у складзе БССР, з 15.01.1940 г. вёска ў Ганцавіцкім раёне Пінскай вобласці, з 12.10.1940 г. ў Ганцавіцкім (з 1954 Любашаўскі) с/с. У 1940 г. 43 двары, 211 жыхароў.

У Вялікую Айчынную вайну з 30.06.1941 г. да 08.07.1944 г. акупіраваны нямецка-фашысцкімі захопнікамі.


З 08.01.1954 г. ў Брэсцкай вобласці. Паводле перапісу 1959 г. 168 жыхароў. З 25.12.1962 г. да 30.07.1966 г. ў Ляхавіцкім раёне. Паводле перапісу 1970 г. 211 жыхароў.


Планіровачна складаецца з дугападобнай (выгнутай на паўночны ўсход), пераважна аднабакова забудаванай вуліцы, арыентаванай з паўднёвага ўсходу на захад, да якой у цэнтры з паўднёвага захаду прымыкае кароткая вуліца.