АБОРА — 1) старадаўняя гаспадарчая пабудова для кароў. На Беларусі ў 16 — пачатку 20 ст. будавалі з бярвёнаў, брусоў, дыляў «у вянок» і «замётам у шулы», а таксама з плеценымі з лазовых дубцоў сценамі, накрывалі часцей саломай. У заможных сялянскіх гаспадарках абора — вялікі хлеў. У фальварках аборы ўяўлялі сабой комплексы згрупаваных вакол прамавугольнага ў плане двара 4 — 8 хлявоў (з асобнымі варотамі ў кожным), злучаных адзін з другім у суцэльную забудову. Такі комплекс нярэдка злучаўся варотамі з падворкам, выганам, прыгуменнем. У такіх аборах вылучалі памяшканні для цельных кароў і маладняку, для птушак, маглі ўваходзіць таксама стайні, жылыя і гаспадарчыя будынкі для парабкаў.

2) Дзяннік — частка загароджанага двара, прызначанага для дзённага ўтрымання хатняй жывёлы. Найбольш пашыраны на Віцебшчыне.

3) Выгараджаны на выпасах загон для жывёлы.