АЛЬТАНКА,
альтана — летняя дэкарыраваная паркавая пабудова каркаснай канструкцыі для адпачынку, сховішча ад непагадзі. Часцей драўляная ці мураваная, была абавязковым архітэктурным кампанентам рэгулярнага парку панскіх сядзіб. Звычайна размяшчалася ў маляўнічай яго частцы, паблізу ракі, возера ці штучнага вадаёму. Найбольшае пашырэнне на Беларусі мела ў 18 ст. ў пейзажах і рэгулярных парках стыляў
барока і класіцызму.
Часцей мела выгляд ратонды (квадратнай, 8-граннай, круглай у плане), завершанай шатровым або купальным пакрыццём. У наш час размяшчаецца ў гарадскіх парках і прыгарадных зялёных зонах, на дачных участках, у дварах дамоў, школ, дзіцячых садоў, на аўтобусных прыпынках.