АСТРОГ — старажытная абарончая канструкцыя ў выглядзе суцэльнай сцяны з вертыкальна або нахілена ўкапаных у зямлю завостраных зверху бярвёнаў вакол замка,
гарадзішча, пасада.
На Беларусі вядомы з часоў жалезнага веку, пашыраны ў абарончым будаўніцтве 9 — 14 ст. У драўляных замках 16 — 18 ст. выцеснены гароднямі і тзрасамі, але выкарыстоўваліся на менш важных участках абароны і пры неабходнасці хутка збудаваць абарончую сцяну. Вядомы ў замках
Віцебска, Полацка, Мазыра, Мінска, Рагачова і іншых, таксама як агараджальная канструкцыя феадальных сядзіб (Дастоева Іванаўскага раёна).
Замкавыя астрогі мелі ў верхніх частках баявыя галерэі з абламамі і стрэшкамі з драніцы або гонты ў завяршэнні. Астрогам называлася і ўмацаваная частка горада, абнесеная такой сцяной (у Мазыры,
Крычаве). Астрог феадальных сядзіб рабіліся ў выглядзе простага частаколу без баявых галерэй. Такімі частаколамі часам акружалі вёскі, мястэчкі.