БАБІНА КАША – абрадавая страва на радзінах, густа звараная каша з прасяных, грэцкіх або ячных круп, якую гатавала бабка. Бабіна каша павінна была забяспечыць дастатак і доўгі век немаўляці.

Раздача бабінай кашы была заключным, самым вясёлым момантам радзіннай урачыстасці. Пад прыгаворкі і «вымудраванне» бабкі («Натка бабінай кашы, паглядзім на рубельчыкі вашы»), пасля «торгу» кум разбіваў гаршчок («Гадуй, божа, малое, ды каб на той год другое»), а бабка надзяляла кашай гасцей, якія клалі грошы «ўнучку на мылка». У наш час бабіну кашу замяняюць тортам, але дзе-нідзе захоўваецца звычай разбіваць гаршчок.