БАБІНАВІЦКАЯ КЕРАМІКА – ганчарныя вырабы з вёскі Бабінавічы Лёзненскага раёна. Яна ўзнікла ў старажытныя часы, найбольш развілася ў XIX – 1-ай палове XX ст. Выраблялі чырвонагліняную непаліваную, чорназадымленую кераміку. 3 пачатку XX ст. пашырыліся вырабы, аздобленыя размалёўкай светла-жоўтым ангобам (тонкі слой гліны, які наносіцца на паверхню керамічнага вырабу перад абпальваннем, каб згладзіць няроўнасці і надаць вырабу пэўны колер) у выглядзе завіткоў, кропак, парасткаў і паліваныя ўсярэдзіне і звонку (у верхняй частцы) бясколернай палівай, якая ў залежнасці ад характару абпальвання надавала вырабам чырвона-карычневы ці зеленаваты колер.


Акрамя гаспадарчага посуду (збанкі, гаршкі, спарышы, міскі, слоікі) майстры А.Траяноўскі, М.Шчадзінскі, А.Рыжкоў і іншыя выраблялі утылітарна-дэкаратыўны (цукарніцы, цукерачніцы, маслёнкі, вазы) і фігурны посуд у выглядзе фігур жывёл, а таксама цацкі, скарбонкі, попельніцы з лепкай.