БАХМАТОВІЧ Казімір (1808 г., в.Дабраўляны Смаргонскага раёна – 1837 г.) – беларускі і літоўскі графік.

Вучыўся ў Віленскім універсітэце, быў хатнім настаўнікам малявання ў дабраўлянскім маёнтку графа А.Гюнтэра. Пражыў мала, але пакінуў пасля сябе мастацкі след літаграфіяй «Дабраўлянскі сувенір» (1835), партрэтам свайго мастацкага настаўніка Я.Рустэма, «Успамінамі пра Вільню» (1837). Яго этнаграфічныя, побытавыя замалёўкі маюць значнае пазнавальнае значэнне.

У свой час, у 1831 г., яго найбольш цікавыя малюнкі былі змешчаны ў альбоме «Збор нацыянальных і ваенных касцюмаў, намаляваў Казімір Бахматовіч, вучань Віленскай акадэміі на Літве».