ВАРОНКА ЯЗЭП (Іосіф Якаўлевіч; 16.04.1891 г., Сакольскі павет – 1952 г.) – грамадскі і палітычны дзеяч.
Да 1914 г. вучыўся ў Пецярбургскім універсітэце. З 1917 г. у Беларускай Сацыялістычнай Грамадзе, член яе ЦК. Быў у складзе Часовага Савета Расійскай Рэспублікі (Перадпарламента), камісар юстыцыі і ўнутраных спраў Вялікай Беларускай Рады (кастрычнік – снежань 1917 г., Мінск).
Браў актыўны ўдзел у падрыхтоўцы і правядзенні Усебеларускага з'езда 1917 г. У лютым – ліпені 1918 г. старшыня Народнага сакратарыята Беларусі і народны сакратар замежных спраў. Адзін з ініцыятараў абвяшчэння
Беларускай Народнай Рэспублікі.
У снежні 1918 – красавіку 1920-га міністр беларускіх спраў і член кабінета міністраў Літвы. Лідэр Беларускай партыі сацыялістаў-федэралістаў. З лістапада 1922 г. старшыня таварыства «Беларуская грамада ў Каунасе».
У 1923 г. выехаў у ЗША, дзе ўдзельнічаў у рабоце розных беларускіх эмігранцкіх суполак, напісаў шмат розных гісторыка-публіцыстычных твораў па гісторыі і культуры Беларусі.