Утвораны 15.01.1940 г. ў складзе Пінскай вобласці, 12.10.1940 г. падзелены на 12 сельсаветаў: Агарэвіцкі, Ганцавіцкі, Дзяніскавіцкі, Круговіцкі, Кукаўскі, Лактышскі, Люсінскі, Малькавіцкі, Навасёлкаўскі, Рожанскі, Хатыніцкі, Чудзінскі.


З 08.01.1954 г. ў складзе Брэсцкай вобласці. 16.07.1954 г. скасаваны Круговіцкі, Кукаўскі, Чудзінскі сельсаветы, Ганцавіцкі перайменаваны ў Любашаўскі, Лактышоўскі ў Нацкі, Навасёлкаўскі ў Свяціцкі (22.04.1957 перададзены ў Ляхавіцкі раён); 22.12.1959 г. Рожанскі перайменаваны ў Чудзінскі с/с.

25.12.1962 г. раён скасаваны, усе сельсаветы (акрамя Малькавіцкага) і г.п.Ганцавічы перададзены ў Ляхавіцкі, Малькавіцкі — у Лунінецкі раён.

30.07.1966 г. раён ўзноўлены. Уключае г.Ганцавічы і 36 сельскіх населеных пунктаў, падзяляецца на 8 сельсаветаў: Агарэвіцкі, Дзяніскавіцкі, Любашаўскі, Люсінскі, Малькавіцкі, Нацкі, Хатыніцкі, Чудзінскі. Гарадское насельніцтва 41,4%. Сярэдняя шчыльнасць — 21 чалавек на 1 км².


Праз раён праходзяць чыгунка Баранавічы — Лунінец, аўтадарогі Клецк — Ганцавічы — Лунінец, Ганцавічы — Пінск.


Раён размешчаны ў паўднёва-ўсходняй частцы Прыпяцкага Палесся. Паверхня — плоскахвалістая раўнінная. Пераважаюць вышыні 150 — 160 м. Найвышэйшы пункт (195,8 м) знаходзіцца на поўначы раёна каля в.Шашкі. З карысных выкапняў ёсць торф (4 радовішчы з запасам 28,3 млн. тон), будаўнічыя пяскі, гліны (5 радовішчаў). Найбольшая рака — Лань з прытокам Нача, таксама - Цна, Бобрык 1-ы (усе — левыя прытокі Прыпяці). На Лані створана вадасховішча Лактышы. Ганцавіцкі раён — адзін з найбольш лясістых раёнаў Брэсцкай вобласці. Лясы займаюць 53% тэрыторыі. Пад балотамі 13,2 тыс. га. Найбольшыя балотныя масівы — Падвялікі Мох, Пусташ-Дабралуцкае, Галь, Пятрова Паляна, Саніта. У раёне створаны гідралагічны заказнік Падвялікі Мох, частка тэрыторыі раёна ўваходзіць у ландшафтны заказнік «Выганашчанскае». Біялагічныя заказнікі Борскі і Ялоўскі створаны з мэтай захавання ў прыродным стане месцаў росту журавін.

Агульная плошча сельгасугоддзяў 50,4 тыс. га (у тым ліку асушаных 39,1 тыс.). У эканоміцы раёна пераважае сельгасвытворчасць. Асноўная яе галіна — мяса-малочная жывёлагадоўля. Пашыраны пасевы збожжавых і кармавых культур, бульбы. Прамысловасць прадстаўлена прадпрыемствамі будаўнічых матэрыялаў і харчовай прамысловасці. Працуе рыбгас «Лактышы».

На тэрыторыі раёна выяўлены помнікі археалогіі — курганныя могільнікі ў вёсках Агарэвічы, Дзяніскавічы, Малыя Круговічы, Малькавічы, Ясянец. Захаваліся помнікі архітэктуры: сядзіба 2-й паловы ХІХ ст. ў в.Агарэвічы, цэрквы: Праабражэнская (1896) у в.Будча, Георгіеўская (1771 г., другая палова ХІХ ст.) ў в.Вялікія Круговічы, Георгіеўская (1876) у в.Чудзін і іншыя.