ВОСТРАЎ (Остров - русс.) — вёска ў Нацкім с/с, за 20 км на паўночны ўсход ад горада і чыгуначнай станцыі Ганцавічы на лініі Лунінец — Баранавічы, на правым беразе ракі Нача. 169 двароў, 338 жыхароў (14.10.2009 года), на сакавік 2015 года 318 жыхароў, на 1 студзеня 2018 года 283 жыхара.


У пачатку ХІХ стагоддя Востраў узгадваецца ў дакументах (рэвізскіх казках) як невялікае сяло, якое належала памешчыкам Абуховічам. Паводле перапісу 1897 года вёска Круговіцкай воласці Слуцкага павета Мінскай губерні, 59 двароў, 389 жыхароў, працавалі піцейны дом, хлебазапасны магазін.


З 1921 годзе ў складзе Польшчы, вёска Круговіцкай гміны Лунінецкага павета Палескага ваяводства, 84 дамы, 459 жыхароў (з іх 454 беларусы, усе праваслаўныя).


З 1939 годзе ў БССР. З 15.01.1940 года вёска ў складзе Ганцавіцкага раёна Пінскай вобласці, з 12.10.1940 года ў Лактышоўскім с/с (з 1954 года Нацкі). У 1940 годзе 113 двароў, 684 жыхары.

У Вялікую Айчынную вайну з 30.06.1941 года да 7.07.1944 года акупіравана нямецка-фашысцкімі захопнікамі. Побач з вёскай дзейнічалі партызаны брыгады імя Леніна Пінскага злучэння; з фронту не вярнуліся 57 воінаў-землякоў.

З 08.01.1954 года ў Брэсцкай вобласці. Паводле перапісу 1959 года ў вёсцы 508 жыхароў. З 25.12.1962 года да 30.07.1966 года ў Ляхавіцкім раёне. Паводле перапісу 1970 года 406 жыхароў.

Дзейнічаюць Дом культуры, бібліятэка, аддзяленне сувязі, комплексны прыёмны пункт бытавога абслугоўвання, фельчарска-акушэрскі пункт, магазін. У 1973 годзе ўстаноўлены помнік (скульптура савецкага воіна) на ўшанаванне памяці землякоў, якія загінулі ў Вялікую Айчынную вайну, які ў 2015 годзе быў заменены на новы.

Планіровачна складаецца з двух вуліц, арыентаваных з захаду на ўсход (загіб адной з іх ва ўсходняй частцы на поўнач перасякае другую), перасечаных у заходняй частцы трэцяй вуліцай, арыентаванай з паўночнага захаду на поўдзень.


Вёска — радзіма беларускага пісьменніка Міхася Рудкоўскага (1936 — 1991 гады); яго імя было прысвоена мясцовай школе, у ёй створаны музей Міхамя Рудкоўскага), пасля закрыцця школы ў былым будынку размяшчаецца турыстычная база "Астравок".