АБРОЧНЫЯ ТКАНІНЫ, абраканыя (абракоўныя) тканіны — від абрадавых тканін, што вырабляліся па зароку ў крызісных сітуацыях (хвароба, вайна, эпідэміі і інш.) і выконвалі функцыю ахвяравальных дароў, апатрапеяў. Звычайна самыя прыгожыя аброчныя тканіны ахвяравалі на крыжы, што стаялі на абочынах ці на скрыжаваннях дарог, каля крыніц, на могілках, на прошчы, пазней іх вешалі на абразы ў цэрквах, касцёлах, капліцах.


Найчасцей аброчнымі тканінамі былі ўзорыстыя ручнікі, а таксама фартушкі, абрусы, хусткі, стужкі. Выкарыстанне аброчных тканін звязана з дахрысціянскімі вераваннямі старажытных славян. Зрэдку сустракаюцца і ў наш час.