АБВАРА — раствор (баўтуха) для загартоўвання распаленага да чырвані ў ганчарнай печы глінянага посуду. Лакальныя назвы паджога, пажога. Рабілі ў выглядзе рэдкай рошчыны з жытняй ці пшанічнай мукі на вадзе, часта з дабаўленнем бурачнага ці капуснага расолу, дамешкам ільняной ці канаплянай трасты, тоўчанага драўнянага вугалю, сажы. У 19 — пачатку 20 ст. ўжывалася галоўным чынам вясковымі ганчарамі Паўночнай і Цэнтральнай Беларусі.