АГАРОДНІЦКІ КАСЦЁЛ СВЯТЫХ ІАХІМА І ГАННЫ размяшчаецца на могілках вёскі Агароднікі (Вашкевічы) Ганчарскі сельсавет Лідскага раёна Гродзенскай вобласці. Пабудаваны ў 1763 г. з цэглы. Адноўлены ў 2002 г.

Помнік архітэктуры класіцызму. Вырашаны прамавугольным у плане аб'ёмам пад аднасхільным дахам. Да фасада далучаны прамавугольны нартэкс з выступаючым шасцікалонным порцікам з трохвугольным франтонам, над якім надбудавана двухярусная чатырохгранная шатровая вежачка з крыжом. З тыльнага боку далучана кароткая прамавугольная апсіда з самастойным двухсхільным пакрыццём. Бакавыя фасады рытмічна расчлянёны высока ўзнятымі прамавугольнымі аконнымі праёмамі і пілястрамі ў прасценках.