АГОЎСКАЯ РАЗМАЛЁЎКА — від народнай творчасці, пашыраны ў вёсках Агова, Опаль Іванаўскага, Здзітава, Жорнаўка, Спорава Бярозаўскага, Крамно Драгічынскага раёнаў у канцы 19 ст. — 1960-х г.; традыцыйнае аздабленне алейнымі фарбамі мэблі, дываноў, шкляных пано-«карцінак», рамак для фотаздымкаў, тканін для ўпрыгожання інтэр'ера хаты і інш. Выконвалася на дрэве, шкле, палатне, цыраце, паперы. Асаблівай жывапіснасцю і хараством сакавітай паліхромнай размалёўкі, гармоніяй дэкору і формы вылучаюцца агоўскія куфры.

Размалёўка па шкле выявілася ў маляванні насценных пано-«карцінак» як самастойных твораў ці ў выглядзе ўпрыгожаных рамак для фотаздымкаў (майстры В.Бялевіч, Е.Васілеўская, Л.Доўгер, Н.Лапыцька). Яркія чырвоныя, блакітныя, жоўтыя, белыя кветкі, зялёнае лісце і сцяблінкі, часта абведзеныя па контурах чорнай лініяй, маляваліся на глыбокім чорным, часам сінім фоне. Тонкімі лініямі выразна ачэрчаны пялёсткі і пражылкі. Жывапіс нярэдка спалучаецца з аплікацыяй сярэбранай ці залацістай фальгі. У кампазіцыях, заключаных у драўляныя рамкі, раслінны ўзор пераходзіць на іх. Дываны на палатне, цыраце, паперы вылучаюцца сюжэтна-тэматычнымі кампазіцыямі свабоднай паліхромнай размалёўкі. Тканіны для ўпрыгожання інтэр'ера хаты аздаблялі набіваным па трафарэтах найчасцей блакітным ці чырвоным рытмічным узорам па белым паркалі ці палатне.

Матывы агоўскай pазмалёўкі — раслінныя (букеты, вазоны, кветкі, ягады, калоссе, яблыкі, грушы), зааморфныя (ластаўкі, сініцы, зязюлі, галубы), антрапаморфныя («паненка», «кавалер»), геаметрычныя (квадраты, ромбы, прамавугольнікі, хвалістыя і роўныя лініі), часта ўключалі надпісы (добрае пажаданне, прозвішча майстра, год стварэння вырабу). Стыль арнаменту, каларыт агоўскай размалёўкі мелі шмат агульнага з паліхромнай аб'ёмнай вышыўкай гладдзю на адзенні, ручніках, падзорах для ложкаў, накідках для падушак.