АЛАДКІ — традыцыйны мучны выраб. Муку замешваюць на заквасцы, разведзенай малаком, сыраквашай, сыроваткай. Пякуць на папярэдне змазанай тлушчам патэльні ў гарачым духу печы. Раней у святочныя і абрадавыя дні аладкі пяклі з пшанічнай мукі вышэйшых гатункаў, у цеста дабаўлялі яйкі, масла, соду або дрожджы; гатовыя аладкі палівалі цёртым макам (часцей за ўсё на каляды), змазвалі маслам, мачалі ў растопленае сала (тук), смятану ці варэнне.
Аладкі былі пашыраны ў паўднёва-ўсходняй, цэнтральнай і заходняй частцы Беларусі. Цяпер шырока распаўсюджаны па ўсёй тэрыторыі рэспублікі. На Палессі аладкамі называюць
бліны з таркаванай
бульбы: вялікія — на ўсю патэльню і маленькія — «па ложцы».