АНЖАДАЎСКІ КАСЦЁЛ НАЙСВЯЦЕЙШАГА СЭРЦА ІСУСА размяшчаецца ў вёсцы Анжадава Ашмянскага раёна Гродзенскай вобласці. Пабудаваны ў 1995 г. з цэглы на месцы драўлянага храма 18 ст., страчанага пасля Вялікай Айчыннай вайны.

Твор архітэктуры постмадэрнізму. Вырашаны прамавугольным у плане аб'ёмам пад пакатым двухсхільным дахам. Да фасада далучана трохярусная чатырохгранная шатровая званіца, адзіны ярус якой адкрыты арачнымі прасветамі, другі прарэзаны паўкруглымі люкарнамі, трэці — высокімі арачнымі прасветамі. Бакавыя фасады рытмічна расчлянёны прамавугольнымі аконнымі праёмамі, аб'яднанымі высокай аркатурай.