БАГДАНОВІЧА МАКСІМА ЛІТАРАТУРНАГА МУЗЕЯ ФІЛІЯЛ «ФАЛЬВАРАК РАКУЦЁЎШЧЫНА» адкрыты для наведвальнікаў у 1994 г. у в.Ракуцёўшчына Маладзечанскага раёна. Належыць да культурных помнікаў Беларусі.
Тут, у сядзібе шляхціча В.Лычкоўскага, летам 1911 г. гасцяваў беларускі паэт
Максім Багдановіч. «Страніца лепшая ў штодзённіку жыцця!» — так назваў паэт гэты час. Ракуцёўшчынскі творчы здабытак — цыклы вершаў «Старая Беларусь», «Места», паэмы «Вераніка» і «У вёсцы».
Агульная плошча экспазіцыі 210,1 м². «Фальварак Ракуцёўшчына» ўключае сядзібу Лычкоўскіх (домік арандатара, фальварковая хата, гаспадарчыя пабудовы), тэрыторыю вакол сядзібы, Максімаву крыніцу.
Штогод тут адбываецца свята паэзіі і песні «Ракуцёўскае лета», прысвечанае памяці М.Багдановіча.