БЁРДА — ткацкая прылада, што служыць для прыбівання ўтку ў
кроснах. Лакальная назва бярдо. Прамавугольная рама (шырыня 40 — 50 см і больш, вышыня 15 — 18 см) з устаўленымі і замацаванымі пласцінкамі (трасцінкамі) і тонкай (1 мм) асінавай ці кляновай лучынкі.
У 20 ст. бёрда пачалі рабіць з металічнымі пласцінкамі. Для ткання бёрда ўстаўлялася ў набіліцы.
Для вырабу суцэльных посцілак выкарыстоўвалі бёрда да 1,5 м шырынёй. Бёрда для ткацтва рагож рабілі з дубовых пласцінак з вочкамі пасярэдзіне (мачальныя стужкі снавалі пачаргова ў шчыліны паміж пласцінкамі і ў вочкі). Бёрда выраблялі спецыяльныя майстры — бёрднікі.