БЛАГАЎСКАЯ КЕРАМІКА — ганчарныя вырабы майстроў з вёсак Благаўка, Новае Вільянова, Літвінавічы Шклоўскага раёна.

У 19 — пачатку 20 ст. тут выраблялі чырвоную непаліваную, а таксама гартаваную і чорназадымленую кераміку гаспадарчага прызначэння: гаршкі, гладышы, збанкі, цёрлы, вазонніцы, спарышы.

З пачатку 20 ст. пашырана паліваная кераміка з зялёнай палівай. Вызначаецца зграбнымі формамі мяккай мадэліроўкі, надзвычай тонкім чарапком. Шурпатая паверхня крэмавых адценняў прыгожа кантрастуе з зялёнай палівай, нанесенай на ўнутраную паверхню і верхні вонкавы край посуду. Часам на верхнюю частку вырабаў наносілі выціснуты дэкор у выглядзе 2 — 3 хвалістых ці роўных паяскоў.

Промысел спыніўся ў сярэдзіне 1960-х г.