БОЙКА, маслабойкаГалоўная »
БОЙКА, маслабойка — бандарны выраб; пасудзіна для збівання масла. Лакальная назва біянка. Вызначалася разнастайнасцю форм і канструкцый. Найчасцей — вузкая высокая кадачка з клёпак. У накрыўцы пасярэдзіне адтуліна для калатоўкі (біла), верхні канец якой выходзіў вонкі, а да ніжняга прымацоўвалі кружок з дзіркамі (пашыраны варыянт) ці крыжавіну (ударная частка). Такой жа формы бойку выдзёўбвалі з суцэльнай круглай калодкі.
Бойкі (вертыкальнага і гарызантальнага профіляў)
На Беларусі (пераважна на Палессі) былі вядомы бойкі цыліндрычнай формы гарызантальнага профілю (у выглядзе 2-доннай бочачкі, у якой было «акенца» з засоўкай); масла збівалі вярчэннем ручкі, што прыводзіла ў рух лопасці.
У даўнім сялянскім побыце масла збівалі і ў ганчарных пасудзінах (гаршку, макітры і інш.) з дапамогай драўлянай лыжкі ці калатоўкі. На Усходнім Палессі гэты спосаб захаваўся да пачатку 20 ст.
|