БРЭДЗЕНЬ, браднік — традыцыйная рыбалоўная снасць тыпу невада; конусападобны сеткавы мяшок (камера, матня) з двумя сеткавымі крыламі, прымацаванымі да дзвюх палак (клячнікаў). Лакальныя назвы браданік, валачок. Шырыня захопу разам з крыламі 6 — 12 м, вышыня каля 1,5 м.

Распаўсюджаны на тэрыторыі ўсёй Беларусі. На Магілёўшчыне выкарыстоўвалі брэдзень з планкамі (цапкамі) у крылах, на Палессі — брэдзень без кармы, а таксама брэдзені, зробленыя з рэдкавытканай тканіны. Лавілі брэднем уброд 2 чалавекі. Працягнуўшы яго ў вадзе, выцягвалі на бераг для праверкі ўлову.