ДРУЖОК – вясельны чын з бліжэйшай світы жаніха, яго нежанаты брат або блізкі сваяк ці сябра (называлі таксама дружбан, чашнік, падкняжы, паджанішка, шафер, асістэнт). Колькасць жаніхоўскіх дружкоў, як і нявесціных дружак, няцотная.

Старшы дружок разам з жаніхом хадзіў запрашаць на вяселле радню, разам з ім ехаў да маладой, садзіў маладога на пасад, трымаў вянок над яго галавой у час вянчання і г.д. Яго атрыбуты – прыгажэйшыя, чым у іншых дружкоў, ручнік цераз плячо і кветка на левым баку грудзей.