Галоўная | Рэгістрацыя | Уваход | RSS | Чацвер, 25.04.2024, 15:27 | ||||||||||||||||||||||||||||||||
ДРЫБІНСКІ РАЁННЫ ГІСТОРЫКА-ЭТНАГРАФІЧНЫ МУЗЕЙГалоўная »ДРЫБІНСКІ РАЁННЫ ГІСТОРЫКА-ЭТНАГРАФІЧНЫ МУЗЕЙ заснаваны ў г.п.Дрыбін 15.02.1995 г. рашэннем Дрыбінскага раённага Савета народных дэпутатаў. Музею выдзелілі спецыяльнае памяшканне. Кіраўнікамі музея былі Т.У.Лосева, В.У.Нямыкін, А.У.Патупчык. З 2004 г. дырэктар А.М.Рабкавец. Асноўны фонд (2008) налічвае 2089 адзінак захоўвання, навукова-дапаможны — 1445 адзінак. Экспазіцыйная плошча 253 м². У музеі налічваецца 19 калекцый: археалогія, старадрукі, музычныя інструменты, народны касцюм, царкоўнае адзенне і прадметы культу, прадметы этнаграфіі і побыту, народная тканіна, дакументы і актавыя матэрыялы, фонадакументы, народныя майстры, зброя, дэкаратыўна-прыкладное мастацтва, прадметы, якія не ўвайшлі ў калекцыю, абразы, нумізматыка, значкі, фотаздымкі, друк, скульптура. У музеі 6 залаў: «Вялікая Айчынная вайна», «Промыслы і рамёствы», «Шапавальства», «Прырода Дрыбінскага краю», «Абразы», «Народнае адзенне». Першая зала прысвечана перыяду Вялікай Айчынный вайны. Экспазіцыя прадстаўлена тэматычнымі стэндамі: «Мірны час», «Пачатак вайны, акупацыя», «Партызанскі рух на тэрыторыі Дрыбінскага раёна», «Лісты з фронту», «Героі Савецкага Саюза». Экспануюцца дакументальныя матэрыялы, фотаздымкі, зброя, плакаты ваеннага часу. У зале «Промыслы і рамёствы» дэманструюцца прадметы хатняга побыту Дрыбінскага краю, якія адлюстроўваюць асаблівасці жыцця, сельскагаспадарчых заняткаў, рамёствы і промыслы мясцовых жыхароў. У экспазіцыю ўваходзяць прылады працы сялян, рамесныя вырабы, прадметы хатняга ўжытку, фотадакументы. Зала экспазіцыі «Шапавальства» дэманструе працэс стварэння валеных вырабаў: шапак, валёнак, рукавіц. Абсталявана пад майстэрню саматужніка (прылады працы і вырабы). Экспазіцыя залы прыроды краю прадстаўлена дажыначным снапом, у які ўплецены сельскагаспадарчыя культуры, што вырошчваюць на палях Дрыбінскага раёна. Экспануюцца фотавыстаўка на тэму «Дарагія куткі нашага краю» і чучалы птушак. У зале «Абразы» зберагаюцца каля 100 абразоў, канфіскаваных на Брэсцкай мытні і перададзеных у музей Брэсцкім абласным краязнаўчым музеем. Зала народнага адзення прадстаўляе калекцыю традыцыйнага народнага касцюма Дрыбіншчыны. Дэманструюцца жаночы касцюм, які складаецца з кашулі, спадніцы, фартуха і гарсэта; ручнікі канца 19 — пачатку 20 ст. (з Дрыбінскага і суседніх раёнаў). Кампазіцыю дапаўняюць прадметы побыту: калаўроты, ткацкі станок, куфры. Музей арганізуе і праводзіць выстаўкі, прымеркаваныя да ўсіх раённых мерапрыемстваў, стацыянарныя і перасовачныя. Прымаў удзел у фестывалі-ярмарцы «Дажынкі-2006» у г.Бабруйск і святкаванні Дня беларускага пісьменства ў г.Шклоў (2007). Работнікі музея рэгулярна выступаюць з радыёлекцыямі: «Музей і яго дзейнасць», «Дарогамі вайны», «Вызваленне Дрыбіна і ўсходняй часткі раёна». У 2005 г. на яго базе створана аматарскае аб'яднанне «Шапавал», дзе майстры-шапавалы перадаюць сакрэты свайго майстэрства школьнікам. Адрас: 213430, гп.Дрыбін, вул.Савецкая, 5 Крыніца: Музеі Беларусі Музеи Беларуси / [рэдакцыйны савет: Г.П. Пашкоў, Л.В. Календа, М.Г. Нікіцін]. - Мінск : Беларуская Энцыклапедыя, 2008. - 559 с. |
|