ДЗЕРАВЯШКІ – абутак з дрэва, які насілі вясной і восенню. Лакальныя назвы дзеравянікі, клумпы. Былі двух тыпаў: башмакі, выдзеўбаныя з куска дрэва, з круглым або завостраным наском, і камбінаваныя туфлі на нізкім ці высокім абцасе, да драўлянай падэшвы якіх прымацоўваўся скураны верх ці шырокая скураная палоса.

Дзеравяшкі бытавалі ў 19 – пачатку 20 ст. пераважна на Гродзеншчыне і на захадзе Віцебшчыны (спарадычна сустракаліся ў іншых рэгіёнах Беларусі).