«ДЗЯННІЦА» – першая савецкая газета на беларускай мове, орган Беларускага нацыянальнага камісарыята альбо Белнацкама (аддзел Наркамата па справах нацыянальнасцей РСФСР у 1918-1919 гг. быў утвораны ў Петраградзе, меў аддзяленні ў Смаленску, Віцебску, Саратаве і іншых гарадах).
Выдавалася з 1 сакавіка 1918 г. у Петраградзе, з 6 красавіка 1918-га ў Маскве. З 3 снежня 1918 г. выходзіла як веснік Белнацкама і Маскоўскай беларускай секцыі РКП(б). Рэдактары Зміцер Жылуновіч (Цішка Гартны, №№ 1-5), Зм.Жылуновіч і I.Пятровіч (Я.Нёманскі, №№ 6-23), астатнія нумары, паколькі Зм.Жылуновіч і I.Пятровіч шмат часу аддавалі вельмі складаным канкрэтным пытанням утварэння беларускай дзяржаўнасці, падпісвалі выдавецкі аддзел Белнацкама (да № 39) і рэдакцыйная калегія. Друкавала матэрыялы пра падзеі ў Савецкай Расіі, утварэнне
БССР, асвятляла дзейнасць Белнацкама, Беларускага навукова-культурнага таварыства (1918-1919 гг., Масква), спрыяла развіццю навукі і культуры на Беларусі, правядзенню культурна-асветнай работы сярод беларусаў-бежанцаў, якіх сотні тысяч у час Першай сусветнай вайны апынулася ў Расіі.
На старонках «Дзянніцы» з мастацкімі і публіцыстычнымі творамі актыўна друкаваліся
Якуб Колас, Цішка Гартны, Максім Гарэцкі, А.Гурло, I.Дварчанін і інш.
Крыніца: Краязнаўчая газета