ДЗЯРЖЫНСК – горад абласнога падпарадкавання (да 1932 г. Койданава), цэнтр Дзяржынскага раёна, на р. Няцеча. За 38 км ад Мінска, на чыгуначнай лініі (станцыя Койданава) і аўтадарозе Мінск – Брэст.

Паводле археалагічных і іншых даследаванняў, існаваў з XII ст., меў назву Крутагор'е. У пісьмовых жа крыніцах упамінаецца з 1442 г. як Койданава. Гэтая назва не высветленая.

У 1550 — 1831 гг. належаў Радзівілам (Койданаўскае графства; герб з выявай галінак дубу і алівы; буйны цэнтр кальвінізму на Беларусі), пазней – дзяржаўнае ўладанне. 3 1588 г. мястэчка. Неаднаразова з'яўляўся арэнай бітваў (у 1655-м г. у час руска-польскай вайны быў спалены, у выніку чаго згінулі многія помнікі архітэктуры).


У 1871-м пракладзена чыгунка. У 1908 г. адкрыта гарадское вучылішча. У 1920-м г. цяжка пацярпеў у савецка-польскую вайну. 3 1932-га горад набыў сённяшнюю назву. У 1932-1937 гг. цэнтр польскага раёна.


У час Другой сусветнай вайны ў горадзе і яго ваколіцах, якія былі разбураныя і апустошаныя, знішчана больш за 17 тысяч чалавек.


У 1995-м г. тут жыло каля 24,6 тысяч люду. Развіваюцца машынабудаванне і металаапрацоўка, лёгкая і харчовая прамысловасць. 3 помнікаў архітэктуры вызначаюцца касцёл Апекі Божай (2-я палова XVIII ст.), царква (1850).