ЕЎЛАШОЎСКІ ФЁДАР МІХАЙЛАВІЧ (1546 – пасля 1616 г.) – грамадскі дзеяч, пісьменнік-мемуарыст. Валодаў разнастайнымі ведамі ў галіне матэматыкі, справаводства, юрыспрудэнцыі. Ад навагрудскай шляхты быў паслом на Люблінскім (1569) і Варшаўскім (1579) сеймах.

3 А. Трызнам браў удзел у выпрацоўцы дзяржаўна-прававога дакумента – «Трыбунала Вялікага княства Літоўскага», вышэйшага апеляцыйнага суда ВКЛ, які складаўся з 46 дэпутатаў. У 1592-1613 гг. працаваў адвакатам у Навагрудскім земскім судзе. Меў памяркоўна-ліберальныя погляды. Напісаў «Гістырычныя запіскі» (апублікаваныя толькі ў 1886 г.) – самы ранні помнік мемуарнага жанру ў беларускай літаратуры канца XVI - пачатку XVII стст. Гэты твор дае выдатную магчымасць для вывучэння тагачаснага палітычнага і культурнага жыцця ВКЛ, побыту, светапогляду розных слаёў грамадства, характарыстыкі многіх вядомых асоб (рукапіс захоўваецца ў Галоўным архіве старажытных актаў у Варшаве). У 1983 г. твор быў выдадзены ў Мінску пад назвай «Успаміны», у 1990-м ён быў грунтоўна даследаваны навукоўцам Ул. Свяжынскім, які таксама напісаў артыкул пра Ф.Еўлашоўскага для выдадзенай у 2000 г. Беларускім фондам культуры кнігі «Славутыя імёны Бацькаўшчыны» (выпуск першы).