ГАФТГалоўная »
ГАФТ – 1) Ручная ці машынная вышыўка каштоўным матэрыялам: каляровымі шаўковымі, залатымі, сярэбранымі ніткамі, жэмчугам, камянямі. Вышыўка з выкарыстаннем металічных бляшак у аздобе галаўных убораў і адзення вядома з ранняга сярэднявечча, з 19 ст. ўжываліся металічныя мішурныя ніткі розных відаў, бісер. Фонам служыў шоўк, аксаміт, парча і іншыя тканіны. У 16 – 18 ст. на Беларусі гафтам аздаблялі літургічнае і свецкае адзенне, дэкаратыўныя тканіны.
Гафт (фрагмент арната). Петрапаўлаўскі касцёл, вёска Дрысвяты Браслаўскага раёна
Ужываліся разнастайныя тэхнічныя прыёмы – гладзь, высокарэльефнае шыццё "па карце", "у прыкрэп". Вышыўка гафтам падпарадкоўвалася агульнаеўрапейскім мастацкім кірункам, у арнаменце пераважалі стылізаваныя раслінныя матывы.
Гафт (фрагмент сурвэткі). З царквы манастыра быльян. Вёска Баруны Ашмянскага раёна
2) Гафтаванне, гаптоўка – народная вышыўка разнастайнымі відамі ажурных швоў (гл.Сакаленне).
3) Машынная вышыўка белай ажурнай гладдзю па баваўнянай белай тканіне. Сучасная мастацкая прамысловасць вырабляе гафтаваныя тканіны, тасьму для аздобы жаночага адзення, пасцельную бялізну.
|