ГАРА, гaрышча – прастора паміж верхам столі і схіламі страхі ў традыцыйнай сялянскай хаце. Выкарыстоўваецца для захавання хатняга начыння, садавіны; на гары падвешваюць вяленыя каўбасы, кумпякі, сухія сыры і інш.

У летні час тут можна спаць. Асвятляецца праз аконца ў шчыце франтона. Падымаюцца на гару па драбінах з сенцаў ці з каморы, зрэдку — знадворку. Гара адыгрывае вялікую ролю ў стварэнні спрыяльнага мікраклімату ў хаце: памагае захоўваць цяпло ўзімку і, наадварот, засцерагае ад перагрэву ў гарачыню.