«ГРАЧАНІКІ» – традыцыйны танец. Лакальныя назвы «Грэчка», «Грэчачка». Музычны памер 2/4. Тэмп жвавы. Асноўныя рухі: падэбаск, прысядка, падбіўка, вяровачка, дробат.

Зафіксаваны экспедыцыяй на поўдні і паўднёвым усходзе Беларусі. Танец выконвалі па аднаму і ў пары. На Магілёўшчыне танцавалі на вяселлі, калі пяклі грачаныя бліны. На Гомельшчыне ў танцы паказвалі, як месяць цеста, як пякуць аладкі. На Брэстчыне пасля выканання фігуры «ручаёк» усе танцоры рабілі кучу малу (падалі адзін на аднаго). Неад'емная частка танца — прыпеўка:

Гоп, мае грачанікі,
Гоп, мае ячныя,
Чаму ж мае грачанікі
He ўдаліся смачныя?

Выконвалі і іншыя прыпеўкі.