ІВЯНЕЦ – гарадскі пасёлак у Валожынскім раёне (мясцовая назва Іве'нец), на р.Волме. За 31 км ад Валожына, 40 км ад чыгуначнай станцыі Койданава.


Вядомы з ХIV ст. у ВКЛ. З 1798 г. цэнтр воласці Мінскага павета ў Расійскай імперыі, мястэчка – рэгіянальны цэнтр ганчарства.


У 1921 – 1939 гг. у складзе Польшчы. З 1939 г. – у БССР. З чэрвеня 1941 па 6 ліпеня 1944 г. акупаваны нямецка-фашысцкімі захопнікамі. У паселішчы ёсць абеліск на брацкай магіле савецкіх воінаў і партызанаў, помнік на брацкай магіле мірных жыхароў, расстраляных нямецка-фашысцкімі акупантамі.


Захаваліся помнікі архітэктуры: Івянецкі кляштар і касцёл францысканцаў пачатку XVIII ст. (пабудаваны пад кіраўніцтвам мясцовага майстра А.Чахоніча) і Аляксееўскі касцёл (пабудаваны з цэглы ў 1905 – 1907 гг. у стылі неаготыка па фундацыі Э.Каверскага).



Дзейнічае музей народных промыслаў з адмысловай экспазіцыяй па гісторыі ганчарства. За 12 км ад гарпасёлка на хутары Дзяржынава нарадзіўся наркам унутраных справаў Савецкай Расіі і стваральнік ВЧК Ф.Э. Дзяржынскі, якому тут створаны музей.