КАЛОТКА (ад «калатаць» біць) — самагучальны сігнальны музычны інструмент. Называўся таксама ляхотка (ад ляскаць). Уяўляе сабой драўляную прамавугольную дошчачку з адтулінай пасярэдзіне, у якую ўстаўлена драўляная ручка.


Да аднаго канца ручкі (таго, што выступае паверх дошчачкі) прымацаваны малаток. Пры рэзкіх хуткіх узмахах рукі малаток, які круціцца вакол сваёй восі на паўабарота, моцна ляскае аб дошчачку. Удары гучныя, раскацістыя. Да нядаўняга часу калоткі выкарыстоўвалі вартаўнікі як вартаўніча-апавяшчальны інструмент. У наш час існуе як атрыбут касцёльнай службы, які «замяшчае» арганы і званочкі ў вялікі пост.

Бытуе ў Заходняй і Цэнтральнай Беларусі.