КАМЫ – 1)
каша з бобу ці гароху. Звараныя боб або гарох таўклі на кашу, запраўлялі салам, часам качалі ў галушкі, елі з саладухай (Вілейскі, Пастаўскі раёны, Магілёўшчына). Пазней на камы пачалі варыць паасобку гарох і бульбу, потым разам таўклі, запраўлялі. Камы рабілі таксама з тоўчаных бульбы і канаплянага ці льнянога семя. На Віцебшчыне камы – галушкі з тоўчанай бульбы і мукі, часам начыненыя (крапаныя) пасечанымі грыбамі, кавалачкам сырога сала;
2) тоўчанае семя; макуха;
3) каша з тоўчанай бульбы. Лакальныя назвы камяк, кама, таўканіца, бульбяная каша. Абабраную вараную бульбу таўкуць, дадаюць гарачае малако, запраўляюць рассквараным салам з цыбуляй або маслам, а ў пост – тоўчаным семем. Ядуць камы з малаком, кіслымі гуркамі і
капустай. Вядомая страва паўсюдна;
4)
галушкі з аўсянай або гарохавай мукі, замешанай на вадзе з соллю ў крутое цеста. Іх адварвалі, адцэджвалі і залівалі малаком, салам або прыправай з тоўчанага канаплянага семя. Пашыраныя ў Верхнядзвінскім раёне.