КАНСТАНЦІНАЎСКАЯ КАПЛІЦА размяшчаецца на могілках на паўднёвы захад ад вёскі Канстанцінава Мядзельскага раёна Мінскай вобласці. Узведзена ў сярэдзіне 19 ст. з цэглы і бутавага каменю.

Помнік народнага дойлідства. Вырашана двух'яруснай чатырохграннай прысадзістай вежай, завершанай шатровым гонтавым дахам. Выкладзены з буту першы ярус прарэзаны на франтальнай грані арачным уваходным праёмам, другі цагляны — глухі, крапаваны арачнымі і прамавугольнымі нішамі.