КАРАВАЙНІЦЫ – удзельніцы абраду прыгатавання каравая ў хаце маладой і ў хаце маладога. Выбіраліся паважаныя замужнія жанчыны, якія былі ў першым шлюбе і жылі ў сямейнай згодзе (не бяздзетныя). Звычайна колькасць няцотная, а ў некаторых мясцовасцях – толькі цотная.

Старшая каравайніца (пачынальніца; найчасцей ёю была хросная маці або родная цётка) першая пачынала кожны этап (сыпала муку, рашчыняла і мясіла цеста), кіравала ўсім працэсам прыгатавання каравая і звярталася да ўсіх прысутных са спецыяльнымі формуламі-просьбамі дабраславіць каравай: рашчыніць, замясіць, упрыгожыць, вынесці ў камору і г.д. Атрыбутам старэйшай каравайніцы часам была прымацаваная да яе хусткі пасмачка кужалю або некалькі ваўняных нітак чырвонага колеру.