КАЎБАСА – мясны выраб. Лакальная назва – кілбаса. Прадукт харчавання з адмыслова прыгатаванага фаршу. Мяккае мяса з лапатак і іншых частак свіной тушы, часам паляндвіцу, дробна сякуць, рэжуць (у наш час пракручваюць на мясарубцы), дадаюць парэзанае сала, соль, часнок, укроп, здрабнёны лаўровы ліст, гарчыцу, каляндру, кмен, перамешваюць і гэтым шчыльна начыняюць тонкія свіныя кішкі або штучныя абалонкі. Раней мяса напіхвалі ў кішку рукой, развёўшы яе дроцікам або лубяной дужкай. У наш час – праз трубку, якую прымацоўваюць на мясарубку. Напханую каўбасу завязваюць у кольцы, вешаюць пад страхой вяліцца. Некаторыя спачатку падсушваюць над печчу, потым перавешваюць у халоднае месца для захоўвання, часам вэндзяць.

Сухую свіную каўбасу захоўвалі да лета, спажывалі ў святы, у пару працаёмкіх сельгаспрацаў.

Рабілі таксама вараную каўбасу з вантробаў (вантрабянку) – ліверную (ліверку) і з дадаваннем крыві і сала – крывяную (крывянку). Такія каўбасы спажывалі адразу, а не захоўвалі. Часам адвараную крывянку ахалоджвалі, паклаўшы пад гнёт.