КІЯКАВАЎСКАЯ КАПЛІЦА размяшчаецца на вёскі у вёсцы Кіякава Докшыцкага раёна Віцебскай вобласці. Пабудавана ў 1907 г. з цэглы як пахавальня ўладальнікаў маёнтка Кіякоўскіх.

Помнік архітэктуры неакласіцызму. Вырашана прамавугольным у плане вертыкальна выцягнутым аб'ёмам, узнятым на высокі цокаль і накрытым двухсхільным дахам. Фасад завершаны трохвугольным франтонам з люкарнай па цэнтры, крапаваны пілястрамі, па восі сіметрыі прарэзаны лучковым уваходным праёмам і паўкруглай люкарнай над ім. Бакавыя фасады расчлянёны пілястрамі і цэнтральнымі арачнымі аконнымі праёмамі. Памяшканне перакрыта цыліндрычным скляпеннем на распалубках. Пад капліцай склеп-пахавальня.