КЛЮШЧАНСКІ КАСЦЁЛ СВЯТОГА ЯЎХІМАГалоўная »
КЛЮШЧАНСКІ КАСЦЁЛ СВЯТОГА ЯЎХІМА размяшчаўся ў паўночна-заходняй частцы вёскі Клюшчаны Астравецкага раёна Гродзенскай вобласці. Пабудаваны ў 1726 (86) г. з дрэва па фундацыі Я.Корсака; капітальна перабудаваны ў 1905 г. Закрыты ў 1948 г., адноўлены ў 1990 г., асвячоны 16.10.1993 г. Быў акаймаваны бутавай агароджай з мураванымі слуповымі брамамі, згарэў раніцаю 6 чэрвеня 2017 года.
![](/_si/16/26578187.jpg)
Помнік архітэктуры неаготыкі. Прамавугольны ў плане храм з пяціграннай апсідай, па баках якой — нізкія сакрысціі. Галоўны фасад завершаны трохвугольным франтонам і фланкіраваны двух'яруснымі чацверыковымі вежамі, накрытымі высокімі шатрамі (надбудаваны ў 1905 г. замест цэнтральнай васьміграннай званіцы) з франтончыкамі- вімпергамі ў аснаванні. Такая ж меншага памеру сігнатурка вянчае гранёны дах над алтарнай часткай. Бакавыя фасады рытмічна расчлянёны высока ўзнятымі лучковымі аконнымі праёмамі з сандрыкамі і брусамі-сцяжкамі ў прасценках. Уваход арганізаваны праз невысокі прытвор пад пакатым двухсхільным пакрыццём. У афармленні фасадаў выкарыстана фігурная шалёўка.
Унутры малітоўная зала чатырмя слупамі падзелена на тры нефы, перакрытыя агульнай кесаніраванай бэлькамі столлю.
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|