«КОЛА» — традыцыйны танец. Называўся таксама «Кружкі», «Кругавая», «Круток». Музычны памер 2/4. Тэмп хуткі. Галоўная асаблівасць яго — рух па крузе і ўсялякія кружэнні. Пад рознымі назвамі пашыраны па ўсёй Беларусі.

Р.Друцкі-Падбярэскі апісаў «Кругавую» наступным чынам: «...танцор жвава абнімае постаць маладой танцоўшчыцы, паварочвае і перакідвае яе ў такт дуды і скрыпкі, прыстукваючы кожны такт абцасамі і падпяваючы двухрадкоўе. Танцуючых цэлы рад. Першы ў радзе выдумляе фігуры, якія дакладна паўтараюцца ўсімі; кружацца ў адзін бок датуль, пакуль амаль што не ап'янеюць, тады кружацца ў другі...». Пра «Кружкі» як пра галоўны танец на беларускіх святочных вечарынках паведамляў М.Дзмітрыеў: ад васьмі да шаснаццаці выканаўцаў кружацца ў ім парамі пад музыку і спевы розных кароценькіх прыпевак (Дзмітрыеў М. Збор песень, казак, абрадаў і звычаяў сялян Паўночна-Заходняга краю. Вільня, 1869. С. 256). «Круціху», што выконвалася на вяселлях, нагадвае С.Сахараў. «Круган», што выконваўся двума мужчынамі, зафіксаваны на Брэстчыне, «Круглы» — на Магілёўшчыне.