КОЎБІК — свіны страўнік, начынены мясам. У некаторых мясцовасцях пашыраны назвы кіндзюк, каўдун, кірук, багук. Страўнік вычышчалі, разміналі; мяса з ашыйка, лапатак, сцёгнаў, часам кавалкі сала (Брэстчына) рэзалі, салілі, дабаўлялі духмяныя прыправы, шчыльна складвалі ў страўнік і зашывалі. Вешалі пад страхой у торбе ці ў кашы (каблуку).

На захадзе Беларусі коўбік да вясны трымалі ў расоле, потым высушвалі на сонцы. Правяленае мяса захоўвалася да лета, яго бралі на сенакос, жніво, копку бульбы. Свіны страўнік маглі начыняць варанымі пасечанымі вантробамі, кашай са скваркамі, дранай бульбай. Быў вядомы паўсюдна, у некаторых мясцовасцях робяць і ў наш час.