КРЭЎСКІ КАСЦЁЛ ПЕРАМЯНЕННЯ ГАСПОДНЯГА І МАЦІ БОЖАЙ ЛАСКАВАЙ размяшчаецца ў цэнтры вёскі Крэва Смаргонскага раёна Гродзенскай вобласці. Пабудаваны ў 1995 г. з цэглы.

Манументальны храм трактаваны ў стылі пост-неабарока. Вырашаны трохнефавай двухвежавай базілікай. Прамавугольны ў плане аб'ём накрыты агульным высокім двухсхільным дахам. 3 франтальнага боку далучаны вузкі аб'ём нартэкса, фланкіраваны дзвюма трох’яруснымі вежамі са звонападобнымі купаламі і шпілямі ў завяршэнні. Паміж вежамі высокі шчыт фігурнага абрысу. Вось сіметрыі фасада адзначана ўваходным парталам і вялікім лучковым аконным праёмам над ім, які асвятляе хоры. Плоскасныя бакавыя фасады расчлянёны дзвюмя парамі высокіх арачных аконных праёмаў, выходзяць за карніз. Яруснае нарастанне кампазіцыі ўзмацняецца прыбудовай да апсіды нізкіх сакрысцій.