КРОКВЫ — апорныя элементы каркаснай канструкцыі страхі. Робяцца з тонкіх бярвён, заўсёды ставяцца парамі, у вільчыку злучаюцца ўрубкай і тэблем. Пасярэдзіне, а часцей крыху вышэй, пара крокваў злучаецца брусам («поясам»). У адзіную канструкцыю кроквы аб'ядноўваюцца латамі, якія прыбіваюцца тэблямі, цвікамі (даўней прывязваліся лазой).


Існуе некалькі спосабаў урубкі крокваў: у верхні вянок зруба (ачэп), у верхні вянок і закоцвіну, у падоўжны брус, пакладзены на засценныя і ў засценныя выступы папярочных бэлек. Найбольш дасканалая канструкцыя страхі з апорай крокваў непасрэдна на бэлькі пашырылася ў сялянскім будаўніцтве з пачатку ХХ ст. Такі спосаб мацавання ніжніх канцоў крокваў дазваляе ствараць прасцейшыя фермы, у якіх уся сіла распору ўспрымаецца бэлькай. У сучасным будаўніцтве робяць стрэхі на кроквах з індустрыяльных элементаў.