КРЫЧАЎСКАЯ КЕРАМІКА — ганчарныя вырабы ХV — ХХ ст. з г.Крычаў. Промысел вядомы з ХІІ ст. Росквіту дасягнуў у канцы XVI — пачатку XVII ст. Выраблялі з чырвонай гліны паліваны сталовы посуд (міскі, талеркі, збаны, кубкі і інш.), кафлю, дэкаратыўныя архітэктурныя ўпрыгожанні, вазы, цацкі, дробную анімалістычную пластыку (выявы мядзведзяў, ільвоў, бараноў і інш.), якія вылучаліся высокім узроўнем тэхналогіі вытворчасці.

У аздабленні кафлі XVI — XVII ст. тэракотавай, паліхромнай, паліванай пераважалі геаметрычны і раслінны арнаменты, геральдычныя і анімалістычныя выявы. Вырабы вывозілі ў іншыя раёны Беларусі. У пачатку ХХ ст. працавала больш за 70 ганчароў.