КРЫГА — традыцыйная прылада для лоўлі рыбы ў неглыбокіх зарослых месцах. Складалася з двух палазоў і шаста (дзеда), да якіх прымацоўвалася сетка з тоўстых нітак або рэдка вытканае палатно. Канцамі палазы злучаліся з шастом так, што маглі ўтварыць любы вугал.
Крыга Рыбу лавілі ўтрох: двое, трымаючы крыгу за сагнутыя канцы палазоў, цягнулі яе, а трэці пры дапамозе дзеда прыціскаў палазы да дна. Каб праверыць улоў, палазы зводзілі і прыпадымалі крыгу над вадою. Была пашырана па ўсёй Беларусі.