КРЫЖЫКІ — адна з форм укладкі снапоў пры сушцы ў полі. У першы рад гарызантальна клалі 4 снапы, адзін насупраць другога пад прамым вуглом, каласамі ў цэнтр. На першы рад накладвалі 2-і, 3-і, 4-ы рады. Зверху іх накрывалі снапом. Крыжыкі больш устойлівыя пры ветры, чым бабкі, але ў дажджлівае надвор'е ніжні рад снапоў мог адсырэць, а зерне сапсавацца. Сушылі ў крыжыках звычайна ячмень, пшаніцу, авёс.