КУБАК — святочны галаўны ўбор дзяўчат у неглюбскім строі ХІХ — сярэдзіны ХХ ст. Гранёная або часткова скругленая на патыліцы карона-каробачка вышынёй 11 — 12 см, якую надзявалі паверх валасоў, заплеценых у адну касу.


Каробачку (каркас) рабілі з лубу, паперы і абшывалі тканінай. Аздаблялі кубак паскам белых карункаў, гладка-фарбаванымі чырвонымі, зялёнымі, аранжавымі, сінімі стужкамі (кожная стужка выступала адна з-пад адной на 3 — 5 мм). Па ніжнім краі нашывалі самую прыгожую, затканую рознакаляровымі дробнымі кветачкамі, лісцікамі на фіялетавым фоне стужку — «цвятоўку», якая сваёй прыгажосцю вылучалася ў агульнай кампазіцыі. Колькасць стужак даходзіла да 25. Ззаду стужкі сшывалі, свабодныя канцы іх пакідалі даўжынёй на 1м. На ўсходзе Магілёўшчыны і Гомельшчыны кубак вядомы таксама як вясельны галаўны ўбор маладой.