КУЦЕІНСКАЯ ДРУКАРНЯ існавала пры Аршанскім Куцеінскім Богаяўленскім манастыры. Арганізаваная ў пачатку 1630-х гг. братамі Магілёўскага Богаяўленскага брацтва, ігуменам манастыра I.Труцэвічам. Карысталася падтрымкай магілёўскага і аршанскага мяшчанства.

Спачатку кнігадрукаваннем займаўся С.Собаль, які выпусціў тут 5 кніг, у 1636 – 1654 гг. Выйшла яшчэ 14 выданняў (у асноўным літургічныя, маральна-павучальныя, навучальныя). Выданні былі разлічаныя на брацтвы, розныя пласты гарадскога насельніцтва Беларусі, распаўсюджваліся таксама на Украіне, у Літве, Расіі.

Сярод выданняў «Буквар» (1631) і «Часаслоў» (1632) С.Собаля, «Гісторыя пра Варлаама і Іасафа» (1637), «Дзідаскаліа...» С.Косава (1637), «Лексікон...» П.Бярынды (1653), «Буквар» (1653). Графічнае афармленне кніг (фігурныя гравюры, застаўкі) адметнае мастацкай своеасаблівасцю. У сярэдзіне 1650-х гг. абсталяванне і працаўнікі Куцеінскай друкарі былі перавезеныя ў Іверскі манастыр пад Ноўгарадам.