«КУХАР» — танец, падобны на рускі. Створаны на аснове народнай песні «Ухар-купец». Называецца таксама «Ухар», «Кухар-купец», «Ухар-купец». Музычны памер 2/4. Тэмп умерана хуткі. Выконваецца ў стылі мясцовых харэаграфічных традыцый. Бытуе ў выглядзе імправізаваных сольных скокаў ці ствараецца па прынцыпу гарадскіх бытавых танцаў. У першым варыянце «кухара» кожны ўдзельнік танцуе сваю харэаграфічную імправізацыю, выконвае розныя праходкі, прытупы, драбушкі, хлапушкі, а таксама прысядкі і вярчэнні ўнізе.

У другім варыянце танец парны па форме, кананізаваны па кампазіцыі. Выконваецца па крузе і складаецца з рытмізаваных крокаў, прытупаў, вярчэння ў польцы. Танец у розных варыянтах пашыраны на Усходнім Палессі. Музычны варыянт мелодыі зафіксаваны экспедыцыямі ў Чэрыкаўскім раёне Магілёўскай вобласці.