КУЛАГА — даўняя
страва з мукі, кісла-салодкая мучная
каша. Варылі кулагу з жытняй або грэцкай мукі, з іх сумесі ці з жытняга соладу. Муку спачатку разводзілі летняй або халоднай вадой, размешвалі, потым залівалі варам і падварвалі. Страва набывала салодкі смак (саладжала), потым яе ставілі ў цёплае месца ці вылівалі ў
дзежку, каб укісла. Часам кулагу запарвалі,
квасілі, потым варылі. Кулагу нічым не запраўлялі, елі з
бульбаю, хлебам. Часам кулагу варылі з калінай, чарніцамі.
Вядома амаль па ўсёй Беларусі (за выключэннем заходняй часткі). У розных мясцовасцях кулагу гатавалі па-свойму: на Усходнім Палессі варылі з жытняй і грэцкай, часам ячнай, зрэдку — кукурузнай мукі; у паўночнай, паўночна-ўсходняй і цэнтральнай частках Беларусі — з жытняй мукі ці з
бульбы, на Мсціслаўшчыне — з аўсянай мукі.