КУПАЛАЎСКІ МЕМАРЫЯЛЬНЫ ЗАПАВЕДНІК «ЛЯЎКІ» заснаваны 11.10.1978 г. у Аршанскім раёне з цэнтрам ва ўрочышчы Ляўкі. Агульная плошча 19 га. Размешчаны на беразе Дняпра. Тут у 1935—41 гг. на дачы жыў і працаваў Я.Купала. Ha тэрыторыі запаведніка знаходзіцца будынак былой канторы Копыскага лясніцтва, у якім размешчаны філіял
літаратурнага музея Я.Купалы «Ляўкі», участак лесу, адноўлены будынак дачы паэта, якая была спалена ў
Вялікую Айчынную вайну (1981 г.; па макету мастакоў Я.Раманоўскага і Ф.Анісовіча), домік шафёра, гараж, у якім экспануецца легкавы аўтамабіль паэта маркі «Шэўрале», падараваны яму ўрадам
БССР у 1935 г., дом-гасцініца,
лазня, лядоўня, гаспадарчыя пабудовы, зона масавых гулянняў. Агульная плошча пабудоў 493 м².
Цэнтральнае месца ў мемарыяльным комплексе займае скульптурная кампазіцыя «Восень паэта» А.Анікейчыка, створаная ў 1980 г. напярэдадні 100-годдзя з дня нараджэння Я.Купалы. Яна перадае псіхалагічны стан паэта ў той перыяд, яго перажыванні, пачуцці, якія знайшлі адбітак у вершы «Старыя Акопы». Менавіта ў Ляўках у чэрвені — жніўні 1935 г. пясняр стварыў свой знакаміты ляўкоўскі цыкл, які складаюць 18 вершаў: «Алеся», «Беларусі ардэнаноснай», «Вечарынка», «Дзве дзяўчыны», «Хлопчык і лётчык», «Як я молада была...» і інш. Прырода запаведніка апаэтызавана у вершах «Дарогі», «
Лён», «Сонцу», «Сосны» і інш. На яго тэрыторыі захавалася любімае месца паэта, дзе расце разложысты дуб.
З 1980 г. штогод у дзень нараджэння паэта (7 ліпеня) тут арганізуюцца святы паэзіі, творчыя сустрэчы, школьныя ранішнікі. У 2003—04 гг. было праведзена добраўпарадкаванне тэрыторыі мемарыяльнага комплексу. Запаведнік уключаны ў рэспубліканскія турысцкія маршруты.
Адрас: 221038, Аршанскі раён, в.Ляўкі
Тэл.: +375-2162-716-46